Lasciaci un messaggio

'A vigilia

'A vigilia

'O juorno d''a Vigilia; Me sceto a ll'ora 'e vallo,

sarranno manco 'e cinche, me soso e m'appriparo,

m'affaccio â fenestella; "Che friddo se congela",

metto 'o cappotto niro, e jesco pè gghì a pede,

 

arete 'e mura, sott'ô bbraccio c''a 'nnammuratella,

miezo ô burdello 'e gente, ca vuje nun v''o credite,

ogne puteca aperta, una azzeccata a ll'ata,

sò tutte pisciavinnale, c'hanno fatto 'a nuttata:

 

"Astece, treglie, purpe, jammere, lupine

taratufe, ostreche, vongole, scampe e telline,

chi nun accatta 'o pesce, nun magna tutto ll'anno,

facite 'a tradizione, guè guè v'arraccumanno!"

 

Rignimmo 'e bborze chiene, ce ne turnammo â casa,

sta pè schiarà 'a jurnata, già ce sentimmo stanche,

'o tiempo 'e 'nu cafè, p'arripiglià ll'ardore,

mammà pulezza 'o pesce e nnuje scennimmo ancora,

 

jammo a purtà ll'aurio, âmice e famigliare.

S'è fatto miezojuorno, " Nennè che ce magnammo?".

"Tenimmece liggiere, 'na pizza, ca stasera,

cu chillu bbene 'e Ddio, fernimmo pè scuppià!"

 

Passata pò 'a cuntrora, 'a doppo arrepusate,

pè San Gregorio Armeno c'avimmo cunzulato,

pasture, Bammenielle, tammorre, putipù,

Pullecenella,'a museca, e chi se ne va cchiù!

 

Sò 'e l'otto, è tarde overo, ce stanno p'aspettà,

'a tavola è già pronta, nun resta c'allummà,

'o presepiello, l'arvero e pè dda 'nu tocco 'e 'ddore,

'nu bello 'ncenziamento: "Sciò sciò a tutti 'e malore!".

 

Tenimmoce pè 'mmano, Ggiesù, nostro Signore,

tu ca viene a 'stu munno, dacce 'a Benedizione,

te sì fatto criaturo, nun si vvenuto 'a Rre,

perduonace stasera, âmmo bisogno 'e te!

 

Tra 'a 'nzalat''e rinforzo e 'o scialatiello 'e mare,

guardammo 'na cummedia, addivinate quale?

'Sta Lucariello, 'o pate, ca lle piace 'o presebbio,

e Tummasino, 'o figlio, ca nun 'o pò abbedè!

 

Frittura, capitone, 'o spassatiempe, 'o ddoce,

cassate, roccocò, struffoli e mustacciuole.

Primma d''o panettone, 'na passatella 'e tombola,

Papà c''o panariello: "Quarantasette, 'o muorto!

 

quattuordece, 'o 'mbriaco!" - "Ambo!". Chesta è mammà!

'A ciorta è sempe 'a stessa, nun se vò maje aggirà!

E' quase mezzanotte, brinnese, aurie e vase,

mentre sonano a festa, "Din don" tutt' 'e campane!

 

Auguri di un felice Natale a tutti voi,

amatevi, amate Napoli, amate le nostre tradizioni,

e mentre siete a tavola stasera o domani,

guardate "Natale in casa Cupiello",

anche e soprattutto nel ricordo di Luce De Filippo!

Abbiate nel cuore gioia e fede e qualora vi manchino,

sappiate che lassù, qualcuno vi ama e se non ci credete,

possiate ricevere gli stessi sentimenti di pace e serenità

nel vostro animo, ne abbiamo tutti bisogno!

 

Gaetano Iodice